MANJALAKI BISUK NA PETO

by edi nasution

 

Dompak au sikola dasar (SD) na baron ira-ira tolu pulu lima taon na solpu, santak tu ari sadari on ita mangolu i jaman globalisasi on, sasakali boto unjung do ubege alak Mandailing mandok sada-dua hata na targaduk binege suping niba, ima: ”Si Bisuk Na Oto”. Artina, “sasada alak na bisuk tai didok muse oto”. Songondia dei luai antusan ni i ? Ah, na adong-adong sajo mada ulah ni alak Mandailing on da tele ale pamasa koum-sisolkot nami.

Muda giot binoto antong ira-ira tarsongondia do tabiat ato parange ni “Si Bisuk Na Oto” on na jolo, anggo ringgas ita baca ma jolo mulak buku carito na unjung i suratkon ni koumta Muhammad Kasim Dalimunte (gorar ni ibana na dung tarmauk boti tarbonggal tu jae-julu ima “M. Kasim” sajo). Judul ni buku na i karang ni ibana i ma ”Bertengkar Berbisik” (1929). Carito-carito na i suratkon ni Muhammad Kasim Dalimunte i , asalna sian carito-carito na dong di hangoluan ni alak kita na jolo. Oni arani malona M. Kasim on mangarang carito na pondok-pondok, i ma da so ibana i gorar ”Bapak Cerpen Indonesia”.

Ning sudaronta Ahmadun Yosi Hernanda (2006), carito-carito songon na i karang ni M. Kasim i muloi dibaca dohot itandai alak na bahat i huta-huta na godang (misalna Jakarta dohot Medan) ira-ira taon 1930-an. Carito-carito na songonian inda tarsarak sian hangoluan ni alak pangaranto na marroan sian dia-dia tu huta-huta na godang i manjalaki hangoluan na hum pade, oni dung muse do jadi uti-utian ni alak na marsikola di si maso i. Carito-carito na pondok i jot-jot muse isuratkon i koran dohot majalah, oni manjadi saro na baru ma ji alai ambaen mancaritoon mulak hasomalan-hasomalan atope paradatan ni alak-alak kampung.

Na lobina boto, carito-carito na pondok on i tafsirkon kalai mulak, ikecekkon dohot i sise alai muse manat-manat. Sabotulna, muda ita ligi sian isi dohot bontukna, carito-carito na pondok on ira-ira tarsongon uti-utian ni alak si bontar mata i do on, i ma “short story“. Muda di banuanta on ’ntong, carito-carito na pondok i balakangan dei ro na, parjolo do adong “puisi”, “novel” dohot “drama”. So simburna na baron alak na ra mangarang carito-carito na pondok (“cerpen”) i, arana di maso i adong dua majalah na ra menerbitkonna, ima ”Pedoman Masjarakat” dohot “Poedjangga Baroe”. Muda carito-carito na pondok i parjolo-jolona hum na mancaritoon parhalan na menek-menek boti na gidik-gidik, ira-ira tarsongon carito ni “Si Bisuk Na Oto” i, tai lolot-lolot mur mur mabolak santak tu parhalan tondi, sumangot dohot sinaloan ni jolma, atope carito pamborontakan ni bangso-bangso na giot mardeka sian panjajah misalna.

Aso do langa bonggalna carito ni “Si Bisuk Na Oto” on di Mandailing sian na jolo santak tu ari sadari on mandok tolu parhalan na ponting. Sada, sampe sannari gakku adong dope alak Mandailing na tabiatna songon “Si Bisuk Na Oto” i, tai ise alakna, tinggal i huta dia, oni sadia bahat alakna inda na binoto. Dua, tabiat ato parange ni “Si Bisuk Na Oto” on sabotulna inda na pade ji alak Mandailing arana inda sasue dohot paradatan ni alai. Tolu, sadalan dohot na dua i, sabotulna paradatan ni alai i markagiot bahaso satiop alak Mandailing sugarina angkon na jadi “alak na bisuk” do, dung do “adat dohot ugari” i amalkon i bagasan ni hangoluanta di portibi on, ima “olong dohot domu”, “salumpat saindege”, “sangap marmora”, “elek maranak boru”, “manat-manat markahanggi”, “mate mangolu sapartahian”, “sahancit sahasonangan”, “sasiluluton sasiriaon”, “sahata saoloan satumtum sapartahian”, “marbaso”, “sangko”, dohot na asing-asing na i.

LOSOK ONI PARGABUS MUSE

Taringot tu parange ato tabiat ni “Si Bisuk Na Oto” on, sataon na solpu laenta Zulkifli B. Lubis na sian Gadingbain unjung mandok obar di au ira-ira tarsongon on: ”… muda ita get mamboto sanga ise do sabotulna ‘Si Bisuk Na Oto’ on, ita jalai ma parumpamaan ni alak kita Mandailing satontang tu si. Na uboto adong sada perumpamaan mandok: bisuk na so tarparguru, oto na so tarajar i”.

Artina, bope madung mohot boto gorar ni sasada alak i dibaen kalak “Si Bisuk Na Oto”, tai ba anggo ilala ia na pintaran do ia, inda alak na oto ia. Arana ni i mada “Si Bisuk Na Oto” on inda bisa tarparguru, ma pintar tu, ro do ma “tu” na i jabat boto. Sambalik muse antong, arani “Si Bisuk Na Oto” on sabotulna alak na lobi oto, i ma da so inda bisa i ajari koum-sisolkot nia ia so jadi “alak na bisuk”. Anggo di Mandailing boto, bope sasada alak i pintar indape tardok “alak na bisuk”, tai sabalikna “alak na bisuk” somalna alak na pintar juo dei.

I ma da gakku so “Si Bisuk Na Oto” on pe didok kalak muse dei “alak na marraja di ulu totna”, ima sasada alak na paihut giot-giot ni roana sajo songon i, jarang do ibana mamake akal-pikiran dohot ate-ate ni ibana, angkon na obar nia so obar. Anggo ning roa nia sude alak di banuanta on na oto do, sado-sado ia ma ia alak na pistar. Inda nangkan ra ia i talu sian kalak, oni menek muse do alak on sude i mata nia. Alak na songon i muse sifatna di Mandailing didok mon “alak na magutguttu”, ro “tu” nai jabat. Oni so ulang binoto alak ia alak na oto, arana “Si Bisuk Na Oto” on pe sabotulna alak na losok marsiajar boti na so ra muse manjalai “bisuk na peto”, i ma da so inda maila ia mancaritoon paruntungan nia bope dalan margabus, songon gabus ato bual ni “Si Bisuk Na Oto” na i caritoon ni M. Kasim i buku karangan nia i.

Ise-ise ita na jungada mambaca buku na i karang M. Kasim i, gakku rap ita ingot dope bual ni “Si Bisuk Na Oto” i atia ia marburu di arangan dohot manjala gulaen di batang aek.

Ninna adi, dompak sadari kehe ma ia marburu tu arangan. Muloi do sian manyogot sampe tu potang ni ari, ia mang loja pae-paulu tu dolok tu lombang di arangan i, indape na dong dapot sanga aha pe. Arani loja boti nguasna dohot malena ilala ia, bo mangaso ia n’tong i toru ni sada batang ni ayu na godang. Di na mangaso i tarkelong ia n’tong, tai anggo tangan nia leng totop maniop sinapang parburu nia i. Inda lolot ia jabat tarpodom, bulus ngot ia arana adong sada balom na songgop i uncuk ni sinapang nia i. Inda be da, dung i celok ia satongkin balom i, torusma ibingkaskon ia sinapang nia i: ”dor”. Dungi, madabu n’tong balom i: ”puk”, pas tu jolo nia. I joloi ia n’tong balom i laos mikim-mikim arani sonang na roa nia.

Di ari na lain, “Si Bisuk Na Oto” kehe muse ia manjala tu batang aek. Dung tolap tu batang aek an, manjala ma ia. I sampakkon ia antong jala nia i, manombo tar i topi, manombo tar tu tonga, songon i ma ia manjala marulak-ulak inda juo adong dapot gulaen. Anggo di maso i boto, inda tanggung bahatna gulaen di batang aek i, tardokdo aporas, sulum, cen-cen, siating, baung, tingkalang, lonjing, garing, abaro dohot mera. Anggo parcarito ni alak ba maso i, na marsamburetan pe panyampak niba leng na dong dei na sangkot gulaen di jala niba i. Tai biamantong muda songon i rasoki ni ibana dompak, bope usaho ma i dalankon. Lahle baya, mang get kotu ari tai baluang leng na so marisi juo do pe. Tai … i mantong muda rasoki i tele, inda i sangko-sangko nida mata nia na sirlak i ma da sapasang ruak-ruak i topi ni aek i dompak mangkais-kais manjalaki panganon, oni i topi ni batang aek i muse tarida di sia gulaen na bahat dompak marsiradu panganon di si. ”Inang goisnang na topek n’tong na sakali on”, ima gakku obar na ro i bagasan roa nia. Inda na i palolot-lolot nia be, na bulus i sampakkon ia ma jala nia i, i agak ia satonga ona tu darat, oni satonga na i muse bonom i topi ni batang aek i, asidunganna tarjala ruak-ruak dohot gulaen sasampak. Ngabentong, ia pe na muli ma tu huta jinjing ruak-ruak dohot gualen laos mikim-mikim muse arani sonangna pangaroa i nia. Lahle pior, peto mantong “Si Bisuk Na Oto” tele ale pamasa.

 

ALAK NA OTO NANGKAN MARDANGOL

JasikondarSapetona, madung marsak do roa ni sada-dua “alak na bisuk” boto pasari-sari parange ni “Si Bisuk Na Oto” on di Mandailing sian na jolo, tardok do ompungta i Willem Iskander (1840-1876). I bagasan ni sada buku karangan nia i ma “Si Bulus-Bulus Si Rumbuk-Rumbuk” i, adong sada ende-ende na margorar ”Ajar ni Amangna di Anakna na Kehe tu Sikola”, isi na patidaon por ni roa ni ibana anso daganak na marsikola ringgas ma nian marsipoda so marbisuk. Ison ita suratkon mulak sadebana:

Iabo ale amang sinuan tunas!

Langkama ho amang marguru tu sikola

Ulang hum baen song luas-luas

Tai ringgas ko amang marsipoda

 

Imale nian amang

Por ni roangku ho marbisuk

Ampot sogot madok-dokma ulala pamatang

Anso ho doma ubaen usuk

 Ende-ende ni ompungta Willam Iskander i marisi pituah ato sipaingot di ita bahaso dakdanakta angkon na i pasikola do so marbisuk, so ulang leng maoto songon “Si Badu Olo”, dos dohot mei gakku songon “Si Bisuk Na Oto” i. Ning kalak sadebana, muda alak na so ra sikola dohot “alak na losok marsiajar” nangkan jadi alak na oto mei pala, inda dong gakku labona, bope tu iba nia, ulang-ulang ma jolo tu simatobang dohot koum-sisolkot nia sasudena.

Muda iba na oto boto nangkan i paciah-ciah dohot i paoto-oto alak sajo mei, tinggal dangolna doma jiba, labona ji alak. Ngadahe dodas dei ita bege alai dakdanak i atia marmayam taro marsirisaan dohot dongan-donganna mandok obar: ”sate soto mate na oto”, ninna adi. Pandok ni alak na bisuk: ”pangkal ni si dangolan di sada-sada jolma i di hangoluanna, ima oto i”.

Olo pe songon i da ale dongan-dongan pamasa na bisuk-bisuk, ulang ita dok ”Si Bisuk Na Oto”, ”Si Badu Olo” atope ”na oto ma ho” tu koum-sisolkotta, arana ra dei naron mambaen parbadaan, martongkari sanga martenju dibaensa. Arani i jago ita da dongan-dongan so rap rumbuk be ita sasudena na rap mangolu i portibi on, tarlobi-lobi ita sude alak Mandailing na markoum-sisolkot.

Salain ende-ende nangkinondi, adong muse sada na i ende-ende ni ompungta i Willem Iskader na marsipaingot di ita anso ulang lupa paingot daganakta manjalai “bisuk na peto”. I ma na dong i bagasan ni ende-ende na margorar ”Mandailing”. Ende-ende on i tuliskon ibana atia di Adian Bania (Mandailing Godang), dompak so kehe ibana tu Bolanda get paincat sikola arani dapot bea siswa. Dua bait ende-ende i sian parbalakang songon on :

Tinggal ma ho jolo ale

Anta piga taon ngada uboto

Muda uida ho mulak muse

Ulang be nian sai maoto

 

Lao ita marsarak

Marsipaingot dope au di o

Ulang lupa paingot danak

Manjalai bisuk na peto 

Satontang tu son, bolas dokonon ompungta i Willem Iskander na santak por roa ni ibana pabisuk bangsonta i, ima so ringgas na ibana mambaen ende-ende so adong ingot-ingoton ni alak na bahat. Sampe sannari boto leng na bahat dope alak Mandailing na mangingot ompungta i Willem Iskander anak ni Raja Tinating i Pidoli Lombang, inang ni ibana Si Anggur (boru Lubis) sian Rao-rao, ima sada kampung i siborang aek Batang Gadis inda dao sian kampung Tambangan di Mandailing Julu. Ibana unjung marsikola rakyat na i pajongjong ni Bolanda di Panyabungan, dungi manjadi guru di si. Arani ompungta i Willem Iskander on bolas dokonon sasada “alak na bisuk” boti pintar muse, i ma da na mambaen ibana dapotan bea siswa so paincat sikola tu Bolanda. Dung do ibana sikola di si, tai ambaen jotjot na ibana urang sehat, i ma da so inda tarpalalu be sikola i. Arani i mada so mulak ibana tu kampung. Inda piga taon dung i, ibana mambaen sada sikola i Tano Bato, Kayu Laut. Godang do haropan ni ibana so sikola on pala bisa mambaen “alak na bisuk” murmabahat i tano ruranta an, i ma na ni dok kalak juo tano omas sigumorsing Mandailing, na martua sapanjang.

Pandok ni “alak na bisuk” sadebana, ninna ende-ende ato kesenian ni sada-sada bangso i hum bahat dei jaotna ji alai umpado sejarah ni alai, arana i sifatna umum. Sejarah i ning kalai hum na marurusan dohot sada-dua parhalan maia i, oni inda muse na dapot jiba sanga dia na petona, arana ning na sada songon on, tai ro ning na lain na i inda na songon i muse. Anggo ji alak na malo marende-ende i, muda ibana giot mancaritoon sasada parhalan i, gakku inda na ponting ji sia sanga unjung ato inda unjung sasada parhalan i tarjadi songon na dong di bagasan ni ende-ende i, arana na ponting ji sia, ialap akal niba sanga inda isi dohot antusan ni ende-ende i. Oni musengtong, sian bait na sada tu bait na lain, na dong di bagasan ni ende-ende i, angkon na solkot do hubunganna, ira-ira tarsongon andor na marjalikot-jalikot. On ma da na i dok ni alak Barat: ”Poems are supposed to cohere”. Satontang tu son, i ma da gakku so ende-ende atope kesenian na i baen ni alak na malo maruti-utian i adong arti dohot jaotna ambaen ji alak na bahat. Oni bisa muse ninna paias utok-utok, boti palidang dot palambok ate-ate ni jolma; na mambaen kalai so mur marosu, marsada, oni marsiolong-olongan. Muda dung bisa do songon i pala, pado adatna inda nangkan ra i be sasada jolma i mambaen tilako tu koum-sisolkot nia dohot banua inganan hangoluan ni alai sasudena di portibi on.

I ma da aropku sada dalan na nida ni ompungta i Willem Iskander maso i, anso marbisuk ita sudena alak Mandailing na markoum-sisolkot samatua. Botima !!!

Gandoang, 2 September 2009


3 Responses to “Sipaingot Ni Ompungta”


  1. Oktober 13, 2010 pukul 3:37 am

    mangido mohop pala madung mamake bahasa persatuan tui alak uda..rupa bope dao halak mandailing kehe tu huta ni halak nagge lupa tu bahasa ni hita…
    nangkin madung ukirim email/komentar tu blog ni alak uda on, anggo bisa godang roha anso dibalos dohot dijelaskon alak uda majolo tentang model ni pertanggung jawaban nai, alamat emailku yro_ichi@yahoo.com
    tarimo kasih nasagodang-godangna..

    adong mada parjagal utte..
    marjagal sambil mangolos..
    totop do hu paitte..
    andingan suratku marbalos…

    • Oktober 13, 2010 pukul 8:44 am

      olo da amang ningku da pinompar ni Si Baroar
      na gogo boti na ringgas manjalai bisuk na peto
      madung sampe do da olos muyu tu hita na hombar
      sadama nian roanta on ma jolo balosanna di o

  2. September 12, 2013 pukul 3:06 am

    jadi taringot buku parsiajaran SD najolo.


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s




Desember 2016
S S R K J S M
« Jun    
 1234
567891011
12131415161718
19202122232425
262728293031  

Blog Stats

  • 75,846 hits

%d blogger menyukai ini: